सिरहा। सिद्धार्थ प्रिमियर इन्स्योरेन्स लिमिटेडको आयोजनामा मिति २०८३ असोज २३ गते शुक्रबार सिरहाको गोलबजारमा बीमा सचेतना कार्यक्रम सम्पन्न भएको छ।
कम्पनीका मधेस प्रदेश प्रमुख श्री बद्री बहादुर अधिकारीको सभापतित्वमा सम्पन्न उक्त कार्यक्रममा गोलबजार नगरपालिकाका प्रमुख श्री श्याम कुमार श्रेष्ठ प्रमुख अतिथिका रूपमा उपस्थित हुनुहुन्थ्यो। कार्यक्रममा नेपाल बीमा प्राधिकरण, मधेस प्रदेश कार्यालयकी प्रमुख श्रीमती आर्य रावल, गोलबजार नगरपालिका वडा नं. ६ का वडाध्यक्ष श्री संजित कुमार लामा तथा गोलबजार उद्योग वाणिज्य संघका अध्यक्ष श्री विजय साहको विशेष उपस्थिति रहेको थियो।
कार्यक्रममा बीमाको महत्व, आवश्यकता तथा फाइदा, बीमा गर्ने प्रक्रिया र बीमा दाबी प्रक्रियाका विषयमा सहभागीहरूलाई जानकारी गराइएको थियो। साथै, आर्थिक जोखिमबाट सुरक्षित रहन र सम्भावित क्षतिको आर्थिक भार न्यूनीकरण गर्न बीमाको पहुँच विस्तार गर्नुपर्ने विषयमा जोड दिइएको थियो।
कार्यक्रमका प्रमुख अतिथि श्री श्याम कुमार श्रेष्ठले बीमालाई अनिवार्य प्राथमिकतामा राख्नुपर्ने उल्लेख गर्दै दुःख तथा विपद्को समयमा बीमाले आर्थिक सुरक्षा प्रदान गर्ने बताउनुभयो। साथै, बीमासम्बन्धी जनचेतना अभिवृद्धि गर्दै आम नागरिकलाई बीमाको दायरामा ल्याउन सबै पक्षको सहकार्य आवश्यक रहेको धारणा व्यक्त गर्नुभयो।
नेपाल बीमा प्राधिकरण, मधेस प्रदेश कार्यालयकी प्रमुख श्रीमती आर्य रावलले बीमा क्षेत्रको नियमन तथा व्यवस्थापन नेपाल बीमा प्राधिकरणले गर्ने जानकारी गराउँदै बीमासम्बन्धी कुनै गुनासो वा समस्या भएमा प्राधिकरणलाई जानकारी गराउन आग्रह गर्नुभयो।
कार्यक्रममा सहभागीहरूले सिद्धार्थ प्रिमियर इन्स्योरेन्स लिमिटेडबाट आफूहरूले दाबी भुक्तानीको समयमा सहज र झन्झटरहित सेवा प्राप्त गरेको अनुभवसमेत सुनाउनुभएको थियो।
कार्यक्रमको स्वागत मन्तव्य तथा सञ्चालन गोलबजार शाखा प्रमुख श्री विद्यानन्द सिंहले गर्नुभएको थियो।
बीमासम्बन्धी जनचेतना अभिवृद्धि, आर्थिक जोखिम न्यूनीकरण तथा बीमाप्रतिको विश्वास अभिवृद्धि गर्ने उद्देश्यले आयोजित उक्त कार्यक्रम प्रभावकारी रूपमा सम्पन्न भएको छ।
